Lumaemkayo, Dumanonkayo!
Babaen iti daytoy a Web site, iyebkasmi ti gagarmi—dakami a mangbukbukel iti Programa ti Lengguahe ken Literatura nga Ilokano—a mangibaga kadakayo: Lumaemkayo, dumanonkayo!
Kabulon dayta a gagar ti maysa nga arapaap, nabiag ken mangbibiag kadatayo amin, datayo a mairanranud iti daytoy a nabiag ken sibibiag met laeng a kultura ken pagsasao iti Amianan a Filipinas: a sapay koma ta mabalinantayo nga irupir ti espasio a kukuatayo, ti espasio iti kultural a biagtayo iti uneg ken ruar ti Filipinas.
Kastoy ti bukodtayo a panagipapan iti daytoy nga espasio a dinappatantayo, binukatan kas kadagiti sinilong a masirsirmata laeng kadagiti rangrangkis ken kadagiti bakbakir ti biag tapno iti kasta, manipud kadagiti barukong dagitoy a rangrangkis ken bakbakir ket makapartuat, makapatanor, ken makabukeltayo iti maysa a komunidad dagiti Ilokano a ti nakem daytoy ket pudno a naigamer iti lagip ken laing ni Ilokano.
Iti kasta a wagas, saan laeng nga iti ili a nagtaudan dagiti naggapuantayo a puli ti maitag-ay no di ket mairaman dagiti nagkaadu a diasporiko a komunidad dagiti padatayo met laeng nga Ilokano ken dagiti in-inabo ni Ilokano iti ballasiw-taaw.
Ta daytoy ket maysa a banag a di mainsasaanan: a kadagiti diasporiko a komunidad dagiti Ilokano kadagiti lugar a nagkalkallautangan ket ti agtultuloy a pannakibalubal ni Ilokano, pannakibalubal a saan a kas karina, pannakibalubal a makasapul unay-unay iti pinget, andur, takneng, ken tured.
Kas met iti ili a naggapuan, adda dagiti karit iti panagirupir kadagiti naintaoan a kalintegan, kas iti kalintegan iti bukod a lengguahe ken iti bukod a kultura, kas iti kalintegan nga agbiag iti ballasiw-taaw a natalged—ken natalged gapu ta nga ibabaet dagita a pagsasao ken kultura dagiti di agmawmaw nga adal ken panirigan nga impatawid ti naggapuan a puli.
Umuna ditoy ti karit a masapul a sarangten. Daytoy ti karit a maigapu iti rekisito ti kultural ken lingguistiko a diversidad, ti diversidad a maysa nga arapaap a makasapul iti sustenido nga aksion tapno iti kasta ket maipatungpal dagiti amin a gandat a mainaig iti panangted iti hushusto a panagrespeto ken panangted iti panagilala iti lengguahetayo ken iti kultura a sabsabokenna.
Maikadua ti obligasiontayo a moral a mangiseguro iti nagan ti masakbayan ken iti nagan dagiti sumaruno a kaputotan a daytoy a pagsasao, a daytoy a lengguahe, ken daytoy a kinaasinno ni Ilokano nga idatdaton ti lengguahe ken kulturana ket ni kaano man ket dinto maungaw, dinto mapukaw, dinto maipadpadisi.
Ngarud, iti daytoy a Web site, makitayo dagiti aktividad ti Programa—aktividad a mangitan-ok iti kina-Ilokano.
Masaksianyo kadagitoy a panid ti ar-aramiden ti Programatayo ditoy nga Universidad tapno magabenanna nga ipatungpal ti mandatona a saan laeng nga aggapu iti Estado ti Hawai’i no ket aggapu met a mismo kadagiti nagkaadu a komunidad dagiti Ilokano iti intero a lubong.
Ngamin ta ni Ilokano ket saan laengen nga iti Ilocos—iti Filipinas—a masarakan.
Ngamin ta ni Ilokano—iti laksid ken maigapu iti kina-Ilokanona—ket siudadano met iti lubong ken iti universo.
Lumaemkayo ngarud, pagpatgenmi a gagayyem, dakayo a mamati kadagiti aramidtayo a mangipaneknek a nasken ken rumbeng laeng nga ilalaen ti pagsasao ken kultura nga Ilokano.
Dumanonkayo, kakabsat, iti daytoy nanumo a taeng ti Programa, tapno babaen ti ilalaemyo ken isasangbayyo ket masaksianyo nga awan ngatan ti mas naim-impanawanen a pannakidangadang iti nagan ti kina-Ilokano no ni kadagitoy a tiempo.
Itedmi kadakayo ti naimpusuan a panagyaman.
Siraraem,
Aurelio Solver Agcaoili
Coordinator